JO KULLËS, PO ZHVILLIMIT

Aktivistë lokalë dhe të Lëvizjes BASHKË shpërndanë fletushka dhe postera kundër ndërtimit të kullave në zonën historike të qytetit të Shkodrës. Ata shkruan edhe një parrullë në murin e Bashkisë. Teksti i fletushkës së shpërndarë në dyert e dyqaneve dhe nëpër rrugë është si më poshtë: "Qytetarë shkodranë! Ata që erdhën me premtimin e madh për t'i ndërruar fytyrën Shkodrës, Benet Beci dhe Edi Rama, me kullën që duan të ngulin në zemrën historike të qytetit treguan fytyrën e tyre të vërtetë: betonizim dhe kapje e shtetit. Qytetarë shkodranë! Kullat nuk janë zhvillim, por pastrim i parave të pista. Ato nuk krijojnë ekonomi, por do të falimentojnë të gjitha bizneset e vogla të bujtinave, hoteleve, kafeneve dhe dyqaneve të vogla përreth. Qytetarë shkodranë! Zhvillim do të thotë ringritje e industrisë, bujqësisë, tregtisë, turizmit të matur, shkolla dhe spitale më të mira, transport publik, rrugë, elektrifikim dhe ruajtje e traditës kulturore. Kullat janë simbol i oligarkisë dhe autoritarizmit politik. Qytetarë shkodranë! Rezistojini rrenës dhe shkatërrimit urban! Qyteti është në dorën tuaj. Lëvizja BASHKË është në krahun tuaj."