SKANDALIT TË INCINERATORËVE I DUHET SHKUAR NË THEMEL

Projekti i incineratorit të Tiranës është një skandal i hapur që sfidon parimet më themelore të transparencës, drejtësisë dhe përgjegjësisë publike. Ky projekt, i cili premtonte zgjidhje për një nga problemet më të mëdha mjedisore të kryeqytetit, ka shërbyer si një vrimë e zezë ku janë zhdukur dhjetëra miliona euro, ndërsa përgjegjësit vazhdojnë të mbeten larg dorës së drejtësisë.

Denoncimet e fundit nga Arben Ahmetaj - ish-zv/kryeministër dhe ministër i Financave - hedhin dritë të re mbi një rrjet të thellë korrupsioni që përfshin figura të larta politike dhe biznesmenë të diskutueshëm, si Blerim Hoxha - një emër që përmendet për herë të parë në këtë kontekst dhe i cili tashmë është i njohur për rolin e tij në Rafinerinë e naftës në Ballsh. Ky rast i fundit është thjesht një kapitull i ri në një histori të gjatë abuzimi dhe keqmenaxhimi.

Veçmas, mungesa e një hetimi të thellë dhe të pavarur ndaj Erion Veliajt, kryetarit të Bashkisë së Tiranës, pavarësisht lidhjeve të tij të dokumentuara me projektin, është një dëshmi e qartë një sistemi drejtësie që ende larg nga standardet e shtetit të së drejtës dhe barazisë përpara ligjit.

Është koha që të gjithë keqbërësit, pavarësisht pozitës apo ndikimit të tyre, të mbajnë përgjegjësi për veprimet e tyre. Qytetarët e Shqipërisë nuk duhet të paguajnë çmimin e keqmenaxhimit dhe korrupsionit sistemor. Ne kërkojmë drejtësi, transparencë dhe një fund të prerë të kësaj fryme të pandëshkueshmërisë që ka mbizotëruar për shumë kohë në politikën dhe oligarkinë shqiptare.