PENSIONISTËT NUK DUAN PROPAGANDË PËR XHEPAT E BOSHATISUR

Sot u zhvillua një tjetër shfaqje propagandistike nga Edi Rama, që përpiqet të maskojë dështimet e qeverisë së tij përmes takimeve të sajuara me pensionistët. Për vite me radhë, Rama dhe qeveria e tij kanë ofruar vetëm lemoshë për këtë shtresë të rëndësishme të shoqërisë, duke i lënë me xhepat bosh dhe të përbuzur. Pensionet mbeten poshtë çdo niveli të denjë për një jetë të qetë dhe të sigurt.

Ironia më e madhe qëndron në faktin se, sipas të dhënave mediatike, ky ishte takimi i parë i Ramës me pensionistët që nga 20 dhjetori i vitit 2016. Plot tetë vite kaluan pa asnjë interes për të dëgjuar zërin e tyre, dhe tani, kur qeveria ndodhet në krizë morale dhe ekonomike, ata shfrytëzohen si një trampolinë për zgjedhjet e ardhshme!

Megjithatë, sot ish-minatori dhe pensionisti Qani Shino, guxoi të zbërthente propagandën e Edi Ramës. Ai u përpoq të futej në takim për të demaskuar premtimet boshe dhe mashtrimet por, në vend të kësaj, rojet e Ramës e larguan me forcë. Ky veprim tregon qartë se qeveria nuk dëshiron të dëgjojë zërin e vërtetë të pensionistëve, por dëshiron vetëm duartrokitje të sajuara për kamerat.

Pensionistët nuk duan propagandë me xhepa dhe premtime boshe! Ata kërkojnë dinjitet dhe drejtësi! Për këtë arsye, bëjmë thirrje që të gjithë të bashkohen në protestën e së mërkurës, në orën 10:00, përpara Kryeministrisë. Të ngrihemi për të drejtat e pensionistëve, për Minimumin Jetik dhe kundër një qeverie që pasuron pakicën.

Të gjithë bashkë përpara Kryeministrisë!