NË PROTESTË PËR STATUSIN E MINATORIT

Sot minatorë dhe ish-minatorë u mblodhën përpara Kuvendit të Shqipërisë për të kërkuar sërish njohjen e "Statusit të Minatorit", i cili për vite me radhë është injoruar nga ligjvënësit, pavarësisht protestave dhe peticioneve të tyre. Ata treguan për vështirësitë e mëdha të punës së tyre dhe padrejtësinë që u është bërë nga çdo qeveri deri më sot, duke i sorollatur mes dyerve të ministrive dhe Kuvendit.

Pankartat e protestuesve reflektonin gjendjen e tyre ekonomike, ku theksohej pamjaftueshmëria e pensioneve dhe barra e rëndë e shpenzimeve për ushqim, ilaçe dhe shërbime mjekësore.

Aktivistët e Lëvizjes BASHKË morën pjesë në protestë, duke qëndruar në krah të minatorëve dhe ish-minatorëve. Ne i mbështesim dhe do t’i mbështesim plotësisht në kërkesën e tyre për njohjen ligjore të "Statusit të Minatorit" – një status që do t’u garantonte një pension dinjitoz, kontrolle shëndetësore falas, sigurim për familjet në rast humbjeje jete dhe ilaçe të rimbursueshme.

Për një Shqipëri më të mirë, të gjithë duhet të luftojmë #bashkë!