Në mbështetje të banorëve të Astirit për problematikat e tyre lokale

Ditën e djeshme, aktivistë të Lëvizjes BASHKË u takuan me banorë të zonës së Astirit, një lagje me rreth 70,000 banorë dhe një nga më të rejat në Tiranë. Kjo zonë përballet me një sërë problemesh që ndihen çdo ditë nga banorët, kryesisht për shkak të mungesës së shërbimeve bazike.

Çerdhet dhe shkollat publike mungojnë, duke detyruar familjet të dërgojnë fëmijët në institucione private ose të udhëtojnë në njësi të tjera, çka kërkon më shumë kohë dhe kosto financiare.

Një tjetër shqetësim i madh është infrastruktura rrugore. Mungesa e ndriçimit, trotuarët e ngushtë dhe sinjalistika e papërshtatshme, për shembull në rrugë si "Jorgo Panajoti" apo "7 Nëntori", kanë çuar në aksidente dhe pasiguri të vazhdueshme për banorët. Po ashtu, mungesa e hapësirave të gjelbërta është një shqetësim i madh, sidomos për pensionistët, të cilët kanë nevojë për vende pushimi dhe qetësie.

Në përgjigje të këtyre problemeve, banorët kanë firmosur një kërkesë që do t'i drejtohet Bashkisë së Tiranës dhe Drejtorisë së Përgjithshme të Rrugëve dhe Ndriçimit Publik, përmes Mirela Rukos, anëtares së Këshillit Bashkiak të Tiranës nga Lëvizja BASHKË. Ky hap synon të kërkojë zgjidhje të menjëhershme për përmirësimin e infrastrukturës dhe rritjen e sigurisë në këto rrugë.

Lëvizja BASHKË angazhohet të jetë pranë banorëve në përpjekjet e tyre për të kërkuar zgjidhje të qëndrueshme për këto probleme, duke u dhënë zë të drejtave dhe nevojave të tyre.

BASHKOHUNI ME LËVIZJEN TONË!