GËZUAR 7 MARSIN
Gëzuar 7 Marsin mësuesve, atyre që kanë barrën e rëndë të edukojnë – përpara se të arsimojnë – një brez të ri të cilit pushtetarët politikë dhe ekonomikë po u bëjnë gjithçka që t'u humbë ndjenja e vlerësimit që arrihet përmes punës e përkushtimit!
Gëzuar 7 Marsin mësuesve, atyre që e kanë gjithmonë e më të vështirë për të qenë shembulli i dijes dhe dinjitetit që imponon respekt, në vendin e pazarxhinjve me kollare, e parallinjve me makina të shtrenjta!
Gëzuar 7 Marsin mësueve shqiptarë që janë më të keqpaguarit në rajon dhe në Evropë për tre dekada e gjysmë, edhe pse detyrohen të bëjnë kilometra në këmbë për të mbërritur te shkolla, edhe pse u mungojnë mjetet bazike të mësimdhënies!
Gëzuar 7 Marsin mësuesve, atyre që pushtetet i shantazhojnë me vendin e punës, i poshtërojnë nëpër mitingje elektorale, i vënë në rresht të duartrokasin nëpër rrjete sociale!
Gëzuar 7 Marsin mësuesve sepse të jesh përnjëmend mësues, nga ata që e dashurojnë mësimdhënien dhe u dhimbset e ardhmja e nxënësve të tyre, është jashtëzakonisht e vështirë në këtë batak ku të pushtetshmit po e zhysin shoqërinë!
Gëzuar 7 Marsin mësuesve sepse me besimin te njëri-tjetri do t’ia dalim ta transformojmë rrënjësisht edhe këtë sistem të kalbur arsimor!