BASHKË, me qytetarët e Korçës

Korça është një qytet me potencial të madh ekonomik në industri, bujqësi dhe tregti. Megjithatë, qeveria e Edi Ramës duket se ka një vizion krejtësisht tjetër për këtë qytet, duke e reduktuar atë në një kafene të madhe, ku turistët konsumojnë shërbime të shpejta dhe largohen.

Ky model zhvillimi është i gabuar, sepse është i paqëndrueshëm dhe nuk garanton rritje të vërtetë ekonomike. Korça nuk ka nevojë për më shumë tavolina dhe shërbëtorë që i japin vetëm një shkëlqim sipërfaqësor. Ky qytet ka nevojë për një ekonomi që krijon vlerë të shtuar, investon në kualifikimin e punëtorëve dhe siguron të ardhura të qëndrueshme në afat të gjatë. Fatkeqësisht, qeveria aktuale është e kapur nga spekulantët që blejnë lirë dhe shesin shtrenjtë, duke i shkatërruar burimet dhe potencialin e vërtetë të Korçës.

Ngrohtësia e mikpritjes korçare ishte në antitezë me temperaturat e ulëta të qytetit të mësonjëtores së parë shqipe.

Na u dha rasti të diskutojmë me qindra qytetarë për shumë problematika: për pensionet e urisë për pleqtë dhe për mungesën e perspektivës për të rinjtë; për produktin bujqësor që kalbet në fushat e Drenovës e të Maliqit; për shërbimin e munguar spitalor dhe për ilaçet e papërballueshme.

Shtruam alternativa dhe debatuam ide, u zotuam se do mbrojmë çdo votë të secilit prej qytetarëve, por mbi të gjitha, nga takimi dolëm me zemrat plot me shpresën e të resë që po lind, tashmë edhe në qytetin e Korçës.