Protesta kundër armëve kimike

Organizata Politike iu bashkua thirrjes së Aleancës Kundër Importit të Plehrave, duke vlerësuar autoritetin e saj moral në luftën kundër importimit të plehrave, që në takimin e 9 nëntorit, kur po përvijohej gjithnjë e më dukshëm publikisht rreziku i importimit dhe çmontimit të armëve kimike siriane. Po ashtu, iu bashkëngjitëm protestës ndërgjegjësuese përpara selisë së Këshillit të Ministrave fill pas atij takimi.

Kundër armëve kimike

Bashke me shumë qytetarë, iu bashkuam protestës së 12 nëntorit para ambasadës së Shteteve të Bashkuara të Amerikës. Prej 12 nëntorit deri në buzëmbrëmjen e 16 nëntorit kemi qëndruar në sheshe, disa prej nesh edhe duke e gdhirë bashkë me protestues të tjerë.

Ne ishim mes protestueve që dëbuan në mënyrë shembullore Sali Berishën dhe Lulzim Bashën nga sheshi. Dëbimi i të mësipërmve ua hoqi propaganduesve qeveritarë gurin manipulues të protestës si proces të organizuar dhe mbështetur nga Partia Demokratike.