Me datë 13 korrik vdiq minatori 31 vjeçar Artur Mjeshtri. Me 14 korrik ai u varros dhe askush nuk guxoi të flasë për fatin e tij, as bashkëqytetarët. Arturi u aksidentua rëndë dy javë më parë në minierat e Bulqizës dhe u transportua për në Tiranë.
Heshtja e policisë, e medias, e sindikatës, e inspektoratit të punës dhe madje edhe e vet spitalit ku luftoi ashpër me vdekjen, është paligjshmëri dhe poshtërsi. Përveç jetës, minatorëve po u vjedhin edhe vdekjen.
Kërkojmë zbardhjen e menjëhershme të ngjarjes dhe identifikimin e firmës bashkë me pronarët e saj, si dhe përgjegjësit përkatës. Jeta e njeriut është mê e shenjtë se numrat në llogaritë bankare të shfrytëzuesve me dhe pa kollare.
Bulqiza nuk mund të jetë më varr masiv për kriminelët e zonës dhe oligarkët e Tiranës.